Suid-Afrika se mees geliefde, vriendelike heksie is terug! Nuwe uitgawes van die gewildste Liewe Heksie-stories met pragtige volkleur illustrasies, maak hierdie reeks perfek geskik vir vroeë lesers. Elke bundel bevat drie oorspronklike Liewe Heksie-stories, spesiaal aangepas vir 3 tot 6 jariges. Besondere volkleurillustrasies deur Vian Oelofsen vergesel die teks en beeld Liewe Heksie, Blommie Kabouter, Karel Kat, Koning Rosekrans en al die geliefde karakters in Blommeland op 'n moderne, maar tog herkenbare wyse uit. Liewe Heksie het haar debuut gemaak in 1961 in die SAUK se Siembamba-programme. Die eerste boeke is in 1965 by Human & Rousseau gepubliseer en sedertdien het die Heksie-stories in verskeie vorms verskyn: van radiouitsending, CD's, marionette, verhoogproduksies en selfs twee televisiereekse. Die Liewe Heksie-omnibus wat in 2002 deur Human & Rousseau uitgegee is het die meeste van Verna Vels se geliefde Heksie-stories saamgevat en hierdie nuwe reeks vervat die stories uit die omnibus nou in nuwe vorm.